Entre moi et mon amin,
en un boix k’est le Betune,
alainmes juwant mairdi
toute lai nuit a la lune,
tant k’il ajornait
et ke l’alowe chantait
ke dit: “amins, alons an”,
et il respont doucement:
“Il n’est mie jours,
saverouze au cors gent,
si m’ait amors,
l’alowette nos mant.”
Adont ce trait pres de mi,
et je ne fu pas anfruine;
bien trois fois me baixait il,
ainsi fix je lui plus d’une,
k’ainz ne m’anoiait.
adonc vocexiens nous lai
ke celle nuit durest sant,
mais ke plus n’alest dixant:
“ll n’est mie jours,
saverouze au cors gent,
si m’ait amors,
l’alowette nos mant.”
